Hessah - Curl Specialist - Teem
مقابلة

حصة - أخصائية الشعر الكيرلي

Spread the love


حصة أخصائية الشعر الكيرلي ومؤسسة أول صالون مختص (Curl Boutique) في جدة. حصة من الناس اللي آمنت بموهبتها ومنها انطلقت في عالم الأعمال.

من كلام حصة " إذا كنت شغوف بشي، آمن بنفسك. بتجيك لحظات بتشك بنفسك بس لا تخليها تتمكن منك وواصل باللي أنت تسويه."

كيف صرتي متخصصة في الشعر الكيرلي؟

بدأ الموضوع من فترة طويلة في أمريكا.. لمن كان عمري 16 سنة في المدرسة كان عندنا الخيار بين أننا ندرس مواد اختيارية أو ندرس في مدرسة مهنية بعد دوامنا العادي وأنا أخترت مدرسة التجميل.

بعد الثانوية رجعت للسعودية في 2003 وقتها دخلت الجامعة في جدة. حلم اني اكون أخصائية شعر ما تلاشى لكن ما كنت أمشي وراه. يعني ما كنت أشتغل بصالون لكن كان معروف بدائرتي الصغيرة أنه حصة هي الشخص اللي ترجع له بأي نصايح عن العناية بالشعر.

درست كتابة التقارير الطبية في برنامج لمدة سنتين وبعدها سويت تدريبي لمدة ستة أشهر وأتذكر اني ما استمتعت فيه أبدًا وما ناسب شخصيتي. أحب أكون في مكان فيه ناس أقابلهم وأتفاعل معاهم.

بعدها اشتغلت في أماكن مختلفة وعلى الرغم من اني انبسطت في كل فرصة حصلت عليها، كان الحلم لسى موجود ولسى مرة أبغى أسوي شي في عالم التجميل ومعرفتي فيه!

بعدها جاتني فكرة استلهمتها من تعليقات ومدح الناس لطبيعة شعري الكيرلي وامتزجت الفكرة بحبي للمواضيع المتعلقة بتعزيز و تمكين المرأة. ومنها بدأت بإنشاء مدونة لأنه ما كنا نشوف هذا النوع من المحتوى عندنا كثير بالسعودية.

قررت اني اتقدم خطوة بأخذ تدريب في نيويورك في أكاديمية DevaCurl. وأول ما خلصتها رجعت كملت في المدونة حقتي وبدأت خدمات قص الشعر. الأيام مرت بسرعة أكثر مما توقعت، حتى ما كان في خطتي أفتح صالون لمن بدأت، الموضوع كان ببساطة اني اكتب في المدونة عشان هذا الشيء يخليني سعيدة وتطور مع الوقت!

كيف تأكدتي أنه الوقت المناسب لإفتتاح صالون Curl Boutique؟

من لمن بدأت المدونة، كثير من عملائي كانوا مقدرين اني اقدم لهم الاستشارات والنصايح اللي تساعدهم بالاهتمام بالشعر بس كانوا يسألوني ويطلبون مني اقتراحات عن ناس تقص لهم شعرهم في جدة وماعرفت أجاوبهم لأني ما كنت أعرف أحد متخصص.

وهنا بدأت أتواصل مع كم صالون عشان أدرّب الموظفات على التعامل مع الشعر الكيرلي. بعض الصالونات كانت مستهينة بالفكرة أو تشوف أنه ما تستاهل الواحد يستثمر فيها و طبعًا وقتها ما كان فيه تقبل كامل لتصفيف الشعر الكيرلي زي اليوم.

من هذا المنطلق قررت اني افتح صالون يخدم هذه الفئة من النساء والرجال المهتمين وأتمنى في المستقبل تصير عندنا صالونات أكثر من هذا النوع.

كلمينا أكثر عن رحلة استكشافك لعالم ريادة الأعمال من خلال افتتاحك للصالون! هل كان عندك خلفية في إدارة الأعمال أو واجهتي بعض الصعوبات؟

لأني شغوفة باللي أسويه أطمح اني أتعلم وأحقق اللي أبغاه بأي شكل كان. اشتغلت في أماكن كثير قبل ومنها تعرفت على ناس كثير وقدرت أكوّن علاقات. لمن جيت أصمم الشعار، كان فيه شخص يساعدني فيه. لمن سويت جلسة التصوير، كمان أحد عرض علي الغكرة! وكان فيه صديقة ساعدتني في كتابة المحتوى للموقع الإلكتروني. كنت محظوظة بناس كثير حولي تقولي "حصة، لازم تسوي كذا واحنا بنساعدك" وفعلًا صار!

واجهت بعض الصعوبات طبعًا كوني موظفة بدوام كامل وأم، إدارة وقتي وتأكدي أنه شغلي الصباحي ما يتأثر بشغل الصالون كان ماخذ من تفكيري.

شي ثاني هو الأماكن اللي عجبتني للصالون كانت لازم تشتغل 5 أيام بالأسبوع وأنا كنت أقدر أشتغل بالويكند بس.

أخذت الأمور بالهداوة وانتظرت الوقت المناسب لافتتاح الصالون. لمن جاء الوقت، كنت جاهزة وكان عندي العملاء والطاقة وبقى موضوع المكان بس.

بالنسبة لهوية الصالون، كيف طلعت معاك فكرة الشعار والألوان والتصاميم؟

أجواء المكان بوهيمية، كنت أبغى شي مريح ولمن تكلمت مع المصمم حكيته عن قصتي وعن الصالون. كنت أبغى لمن تدخل المكان يكون فيه حياة كأنك داخل بيت أحد تعرفه. ما أبغى يجيك شعور لمن تدخل صالون ويكون كل شي حلو ومرتب بس تحس بعدم الراحة.

أبغى أشغل لك شموع وأحط لك كتب على جنب، أبغى المساحة تكون لك أنت كعميل عشان تكون مرتاح.كنت أبغى الألوان تناسب هذي الفكرة، فلمن كلمت المصمم فهمني على طول ورجع لي باقتراحات واتفقنا على واحد منها.

مين يستهدف (Curl Boutique) غير النساء اللي شعرهم كيرلي كعملاء؟

الرجال مرحب فيهم كمان! جاني كم عميل قبل وهذا كان اتفاق مسبق مع المكان اللي أجرت منه المحل.

لسى امس واحد رسل لي أنه يبغى يعتني بشعره ويكون عنده روتين للعناية بالبشرة و طبعًا رديت عليه على طول باقتراحات لمنتجات يقدر يجربها.

هل فيه شي تمنيتي لو عرفتي عنه قبل افتتاحك الصالون وكان بيسهل عليك مرة؟ أو حتى قبل ما تكونين أخصائية؟

أنه يكون عندي موقع إلكتروني من جد ساعدني بنظام الحجوزات. ما كنت أعرف كيف أسويه وكيف بيسهل علي ويساعدني. قبل كنت أسجل كل شي بيدي على اكسل.

أي نصيحة لأصحاب الأعمال الحرة أو الناس اللي بدأت مشاريعها الصغيرة؟

أبغى أقول إذا كنت شغوف بشي، آمن بنفسك. بتجيك لحظات بتشك بنفسك بس لا تخليها تتمكن منك وواصل باللي أنت تسويه.

هل قرأتي كتب ساعدتك في عملك؟

كتاب The Four Agreements لدون ميغيل رويز كان فيه فصل يعلمك كيف ما تأخذ الأمور بشخصنة ومن جد ساعدني كثير.

في كتاب لديباك شوبرا قرأته مؤخرًا ساعدني أفكر بطريقة مختلفة وأكون منفتحة أكثر لأنه لمن تبدأ عمل بتقابل فئات مختلفة من الناس وبتواجه صعوبات كثير لازم تكون مستعد لها وتعرف كيف تتعامل معاها.

وين راح يكون (Curl boutique) بعد خمس سنوات؟

بعد خمس سنوات أشوف أكثر من فرع لـ Curl Boutique في المملكة أو بالمنطقة ممكن. أعرف أنه راح يصير لأني مؤمنة وشايفة هذا الشي!

تابعوا حصة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *